Jûbîyayena quwetan ronîya

Sazgehê Civaka Sivîl û partîyê sîyasî yê Dersim bi damûstayîna çapemenî ronayişê ‘Jûbîyayenaqûwetê Demokrasî û Emegî yê Dersimî’ îlan kerd. Cagiroteyê Jûbîyenaqûwetî aşkere kerdî ke ê dê pêro pîya dûştê polîtîkayanê AKP tekoşîna xo berz bikerê. 

Damûstayîna ke Kuçeyê Sanat’î de amê dayen de hemşaredarê Dersim, temsîlkarê sazgehan û îdarekarê ci ra pîya xêlê kes tewr bi. Damûstayîn de panqarta “Dûştê faşîzmî, derbe û OHALî quwetê xo kenime jû” bî ra. Ser nameyê Jûbîyayenaqûwetî Serokê Şûbeyê ÎHD Gurbuz Solmazî qisey kerd û vist vîrî ke AKP badê hewldayenê derbe yê 15ê Temmuze hewl dana nîzamê otorîter, serdest û kolonyalîst dewam bikero. Solmazî vist vîrî ke pirodayişê nikayî rayanê pêkerdiş û çarekerdişî manî kenê û nîya dewam kerd: “OHAL o ke 2002î ra na het rojdemê Tirkîye ra vejîya badê 15ê Temmuze reyna vistî dewre. Pêrokîn leteyê heq û azadîyan cemidnay. Qerarnameyê ke Hikmê Qanûnî de yê bê ke sebep damûsnê destpa wezîfera girotişan, cipersyayişan, vera çormeyanê mûxalîfî zext, tehdîd û çinkerdîşî kerdî. 

Armancê ronayişê Jûbîyenaqûwetî

Serokê Şûbeyê ÎHD Gurbuz Solmazî armancê ronayişê ’Jûbîyayenaqûwetê Demokrasî û Emegî yê Dersimî’ nîya rêz kerd: 

* “Serva ke dûştê hewldayenê çinkerdişê demokrasî, heqanê esasî û azadîyan yê dîkta pawitişê demokrasî,  

* Serva ke dûştê îdeolojîya paşverû, jûjûyî, otorîter, mezhebî ke wazîyeno bi destê dewlet civakî teslîm bigîro de, çarçoveyê azadîya îtiqatan û azadîyan de berzkerdişê tekoşînî, 

* Serva vindernayişê polîtîkayanê herbî yê zerre û teberê welatî de û seba çarçoveyê weşîya pîyayî, têdûşt û haştîwaşt de, bi ray û raybazanê demokratîk  çarekerdişê sîyasî yê meseleya kurd, 

Dûştê faşîzm û derbeyan tekoşîna wertex

* Seba dûştê mûdaxaleyanê emperyalîzmî yê ameyina ma û welatê ma, seba dûştê faşîzm û derbeyan tekoşînê wertex û pîyayî, 

* Seba dûştê pêrokîn polîtîkayanê serdest û faşîst yê ser emeg, kamî, beden û îradeyê cenîyan yenê ramiten de berzkerdişê tekoşînê azadî û têdûşt, 

* Seba ke dûştê pêrokîn êriş û polîtîkayanê cîyakerdî yê verra alewî û pêrokîn îtiqatan de ramitişê tekoşîna pîyayî, 

* Seba wayîrvejyayişê sûkanê xo, xoza û waranê xo yê weşî, 

* Seba dûştê pêrokîn şîdet, zext yê vera genc, emegdar, bindestan de vinderdişî, 

* Seba dûştê polîtîkayanê taşeronî, feqîrtî vinderdiş û pawitişê heqanê gurekaran ma ameyê têlewe.” 

Damûstayîn de vajîya ke encex tekoşînê quwetanê haştî, demokrasî û emegî êşkenê vernîya şîyayişê welatî bigîrê û nîya vajîya: “Çi qe ke ma dûştê derbeyanê û verra ci de tekoşîn kenê, hendayî zî ma dê kerdenanê otorîter ke weşîya demokratîk hedef gênê dûştê ci de vinderê. Ma heta nika hetkarê demokrasî, emeg, azadî û haştîya civakî bî, neyra tepya zî ma dê na ray de dewam bikerê. Ma milê xo çewt nêkerd, ma dê nêkerê zî.